تصريح اردوغان حول رغبته في تطوير علاقاته مع إسرائيل

اردوغان خرج اليوم بتصريح كايقول فيه انه باغي يطور العلاقات ديالو، خصوصا الاستخباراتية، مع إسرا ئيل وانه ما كرهش هادشي يكون فالقريب العاجل، لكن لي معرقل هاد الخطوة هو شي ناس كاينين فالسلطة الإسرائلية!!

تركيا لي مازال محافظة على علاقاتها التجارية مع إسرا ئيل وشفنا كيفاش اردوغان كان حريص على دعمها ايام ذروة كورونا بالمواد والمعدات الطبية وسيفط ليها 2 طيارات .. غير هو سياسيا القضية متوترة من ايام اسطول الحرية ف 2010 فاش اسرا ئيل ما خلاتوش يدوز ووقع شي صداع، وعاود ف 2018 فاش كل دولة سحبت السفير ديالها من بعد الهجوم الاسرائيلي على قطاع غزة واتهام اسرا ئيل لتركيا أنها كاتدعم حماس وعطات الباسبور ديالها لشي قيادات ديالهم

اردوغان عارف مزيان ان اسرا ئيل قوة ضاربة فمنطقة الشرق الاوسط وعارف انه من مصلاحتو يقوي علاقاتو معاها، خصوصا فالجانب الاستخباراتي (المو ساد) ولكن كايبغي يضرب ويقيس وكايدير بحساب فلسطين (خصوصا قطاع غزة لي فيه صحابو ف تنظيم الإخوان – حماس)!

بمنطق السياسة والمصالح – هادا ماشي رأيي لكن تحليل لشنو واقع – كايبان ان المغرب حتى هو هادشي لي باغي، والاتفاق لي دار مع اسرا ئيل باغي منو المصالح فالوقت لي كايقول انه ما غايتنازلش على دعم القضية الفلسطينية!

السياسة مصالح، غير هو يا ريت ان رجل السياسة يشوف مصالح البلاد التي يقودها ويدير بحساب العباد لي فداك البلاد وما يخليش ان المصالح تنحصر فيه غير هو بوحدو او فئة قليلة .. خاص المصالح ترجع بالخير على كلشي.

والله اعلم عاوتاني…
Ibrahim Elmaghriby

أترك تعليق

لن يتم نشر عنوان بريدك الإلكتروني.