أجي تعرف أهم الخطوات باش تخدم للإمتحان ديالك فوقت وجيز واخا تكون مزال ما بديتي الPreparation!

كيفاش نوجد للامتحان فوقت قصير و مزال مابديت الـ preparation ؟

لخصت هادشي ف 20 نقطة منهم حوايج ممكن تديرها باش توجد مزيان ل exam ديالك و ماتمشيش الخدمة ديالك ف 0.

1- غاتجيب ورقة بيضا .. وتقسمها على جوج، النص الليمن كتب كاع المواد اللي عندك .. وبين كل مادة و مادة غاتخلي 6-5 تاع السطورة .. وتبدا بكل مادة شنو اللي فاهمو وشنو اللي مافاهموش .. وداكشي خاص يكون دقيق (ماشي تبدا هادي صعيبة لا متحطش، لا لا هادي ساهلة مكاين لاش نضيع وقتي معاها)، وكل حاجة رقمها بوحدها مثلا les modules :

1- Marketing approfondie

2- Gestion financière

3- Informatique de gestion

لاكانوا تحت المادة بزاف ديال الكتابات حاول تربطهم بالمحاور.

هادا غا مثال نتا تحت كل مادة حط داكشي تحتها بالترقيم و متكتبهمش فسطر واحد و مجموعين ( غانقوليك من بعد علاش ) صاف غاتكمل كاع المواد ..

على الليسر غاتحط الوقت اللي باقي على الامتحان .. حسب شحال من ساعة عندك باش توجد.

 

2- غاتلقا بلي عليك بزااااف ديال الحمل .. وغاتبدا تحس بلي كنتي كتضيع فوقتك و ياريت بديت من اللول و مابقاش الوقت نكمل و تخيل منجيبش مزيان و نضيع و نعاود و بلا بلا بلا و كاع داك الاحباط اللي كتجيبو من عقلك. آآسمع نتا ولا نتي، الرقم 1 ماشي جدول كيما موالفين كانديروه و مكنخدموش بيه، الرقم 1 الهدف منو انك تعرف شحال عليك ديال الخدمة اللي مفروض عليك تكملها .. حيت الهدف ديالنا دابا اننا نكملو حيت لابدينا بالحبة بالحبة غانبقاو تما مغنكملوش. الهدف انك تحس بلي عليك حمل تقيل على ظهرك. وهادي نقطة ممهمة حيت هي اللي غاتموتيـvـيك

 

3- المهم الجيهة اللي عل الليمن تافقنا عليها وشنو نديرو فيها و من الافضل تزوق شوية و نظم داكشي وكتب بخط واضح حيت غاتبقا تشوف فيها يوميا. عل الليسر أسيدي غاتدير كل يوم اش غاتاخذ فيه .. وكتب بالتفصيل .. المادة كذا.. الصباح غانوض ونرجع للدار مع الساعة كذا ونبدا .. كاين اقتراحات لاستعمال الزمن فالنت قلبو عليهم.. المهم متحطش شي حوايج تافهيـن مكتمشاش مع هاد الهم اللي نتا فيه و ماتحطش حوايج فيهم الخدمة فوقت قصير حيت مغتكملهمش ومتسمعش للهدرة ديال كنعطي للدرس كذا 2 سوايع و لاخر نص ساعة .. لا قسم داكشي على حسب القدرات و الطاقة ديالك. ركز وعطي وقت أكتر للمواد اللي مهمة باش تربح النقاط.

 

4- رااااااعي الوقت .. راه لا محترمتيش وقتك هاد الهدرة كاااملة اللي كنقول واللي غانقول مغتكون عندها تا فايدة سوو تحمل مسؤوليتك و كون تفكر شوية راه مابقا ليك والو و غاتكمل هادشي و غاتجي العطلة و ارا ماتطير و تنزل دابا وقت القراية .. معندكش وقت بزاف ألوغ جمع راسك .. زير السمطة و حيد اللعب عليك. كملنا دابا الليسر قلنا الايام اللعيبات كاملين ديرهم حاول تقسم داكشي على حسب الصعوبة ديال المادة و ماتخدمش مادة وحدة كاملة فاليوم، قسمهم على النهار، اللي عندو شي حاجة دالحفاظة ينوض على النبوري و يصبر واللي عندو البراتيك بحال الماط هاداك ممكن تخليه تال الليل وكل واحد و كيفاش عقلو.

 

5- غادي تصبر معايا شوية .. حيت غانقلب ليك البروغرام ديال نهارك شوية .. التحدي اللي غاتدير هاد الوقيتة اللي بقات ليك هي انه غاتنعس مع 10-11 و تحاول تفيق مع الوقيتة ديال 5 ( غاتبقا تسمع هدرة خاوية ولكن متسوقش ليهم قوليه اه انا بغيت نعس مع الدجاج نتا سوقك ؟ ) هو راه صعيبة ماشي ساهلة و لكن ماشي مستحيلة، وخصوصا فهاد المدة اللي نتا فيها مفروض عليك تديرها منكدبش عليك، وماشي ضروري يوميا، يقدر يوم من بعد يومين من بعد 3 ايام وهاكا غادا ( كلشي على حسب المدة اللي باقا ليك ليكزام ودير حساباتك ) راه كلشي على الالتزام و الانضباط، ونفعاتني بالتجربة، كنت كنحس بلي اليوم فيه كتر من 24 ساعة و كايشيط ليا الوقت ندير فيه حوايج اخرين. ساهل تدوي وتكتب وتقول نوض مع 5 ونعس مع 10 ولكن صعيبة صراحةً .. ولكن كايبقا الاختيار ليك نتا .. نتا تعرف اش تدير انا غا عطيتك اش تدير حيت ديجا مجربها.

 

6- كون متأكد بلي البلاصة اللي كتقرى فيها مافيها لا راديو ولا تلفازة ولا تا شي حاجة فيها الصداع. حاول تهدر مع صحابك ملي تكون libre وماشي فوقت قرايتك. و بعد من الافكار السلبية (مثلا: فشل سابق، خوف، تجارب مخيبة للآمال، إلخ. )

 

7- كملنا من الخطوات الاساسيين .. حطينا الـ plan .. ضبطنا وقتنا ديال النعاس .. دابا غاتقصد البلاصة اللي كتراجع فيها .. مكتب مثلا .. غاتجيب شيفونة و تفزگها بالما .. وتحيد اي حاجة كاينة فيه .. وتمسح المكتب ديالك ( على اساس كتوجد راسك بالنظافة امممم ) .. واخا يكون المكتب مرتب و ممسوح مزيان .. غاترتب اللوازم ديالك فوقو… المقلمة على الليمن و الكالكيلاتريس حداها .. على الليسر دير سوا الكتاب سوا الدفتر و منصحش تدير البيسي الا فالضرورة حيت عارف لا مشيتي تا حليتيه بقيتي تما 3: .. المهم ديك الحاجة اللي غاتراجع منها و خلي بلاصة ديال شي كاس.

 

8- غاتجيب كل حاجة باغي تراجعها كلها حداك .. كلها .. وكاع التفاصيل دير بالك معاها .. حيت ممكن متبداش البريباراسيو حيت ملقتيتش منجرة .. مع أنك تقدر تكون كتراجع من الـ Pdf واصلا مامحتاجهاش .. كتوقع :/

 

9- من الاحسن تاخذ شي مشروب معاك فالمذاكرة و نصح بـ اتاي النعناع ولا قهوة ولا عصير .. وخصوصا النعناع حيت مهدئ للأعصاب .. مغيخليكش متوتر واخا متكونش كملتي .. وكيقصح الكرش وكيخليك تحس بلي راك متزن نفسياً سوو متجاهلش هاد النقطة خصوصا نتا حيت مابقا والو ليكزام و التوتر غادي وكايزيد.

 

10- خاصك تطبق هاد الـ Technique اللي فهاد اللينك كيما مكتوب و كيما مشروح و طراسيه فدماغك . (goo.gl/BCrALH) متنساش فترة الراحة .

 

11- المكتب مصايب .. ساد على راسك .. كاع الحوايح حذاك .. الجدول اللي طراسينا فـ 1 معلق قدامك ..

-يالاه نبداو ..

*لا تسنا دقيقة وحدة ندخل غا نضرب طليلة فالفيس بزربة قبل مانبداو

-امم الصراحة متقدرش تدخل ليه ..

*علاش

-حيت تسد و ماغايتحلش دابا، تيليشارجيت فيه Stay Focused وحددت الوقت اللي الفيس مخاصوش يتحل ليا واخا نبغي ندخل ليه

*—\’

-ماعندي ماندير ليك ! الامتحان باقا ليه سيمانة و خاصك تجيب نقطة مزيانة.

 

12- * اوك دابا يالاه نبداو

-مي تسنا علاياش غادي توجد

*أه عندك الصح، خاصني الوراق اللي نكتب فيهم

-نزل وجيب معاك وراق مسطرين من اي مكتبة .. وأقلام ملونة .. ودابا خدم على واحد بومودورو فالحيط . لا مدخلتيش للينك اللي حطيت ف 10 مغتفهمنيش علاياش كنهدر، المهم كل مرة تجي البريك او الاستراحة من بعد الخدمة .. نزل تراكسيون ولا هبط دير شي حاجة تشربها من رقم 9 ولا تشوف هاد الفيديو التحفيزي https://youtu.be/cTbWRVk4Lcw

⁃ ولا من Vsauce – http://goo.gl/G7m52L

⁃ ولا من هاد القناة الرائعة Minute Physics – http://goo.gl/F7WdPq

 

13- ملي تكمل شي خدمة .. غاتجيب داك الجدول اللي طراسيناه فاللول و بالستيلو حمر .. وتشطب على اللي كملتيه .. كل مرة تكمل من شي حاجة شطب عليها .. على الاقل هادشي كينعكس ايجابا على راحتك النفسية و غاتحس بلي راك خدام و كاتدير شي حاجة ماشي بحال قبل.

 

14- المواد اللي فيها الحفظ حاول تخدمها مع 2 ولا 3 د صحابك ماتزيدش كتر من هاكا، غاتحفظوا ولكن بطريقتكم الخاصة. مثلا مثلا نمشيو لصحاب الاداب شوية .. عندكم التاريخ مثلا .. كل صديق غايشد درس وغايحكيه ليكم بطريقتو الخاصة على شكل قصة وبالداريجة و نتوما تبعو معاه و فنفس الوقت غادي تصححو ليه. وهاكا ملي يتحط ليكزام، الدروس غاتفكرها بداك الموقف.

 

15- متبداش فالمراجعة ونتا جيعان .. حيت ماغاديش تكمل ومتبداهاش ونتا وااااكل بزاااف و متخوم حيت غاتدوخ . قسم الوجبات ديالك فاليوم على وجبات صغيرة. و متخافش حيت كتحس بالتوتر شوية .. شيء عادي كلشي كيحس بداك الشعور و اللي مامسوقش هو اللي كيجيه هادشي عادي .. علاش سماوه امتحان اصلاً ؟ دير اللي عليك ومتخافش.

 

16- كتب notes قصار باش يعاونوك فالمراجعة و خدم بالخطاطات و الرسومات و الاشكال عوض النصوص باش تعقل على المعلومة وتعطي انطباع للذهن كتر. كنتيجة غاتكون قادر تعقل على الحوايح بزربة.

 

17- خلي دوك الدروس اللي كياخدوا وقت كبير باش يتفهموا ومعندهمش قيمة كبيرة فالامتحان. تقدر ترجع ليهم فالاخير لا بقا ليك شي وقت. وتفكر بلي معندكش وقت كافي سوو اللهم تضمن بعدا شي بركة ولا تبقا مبرزط مع اللي كياخدوا وقت وماتشد فتا حاجة.

 

18- خلي وقت ضروري للمراجعة و الخدمة ديال الاسئلة المتعلقة بالدرس. مثلا عندك جهوي/وطني خدم الامتحانات اللي دازو كلما كملتي المادة اما فالدرس كلما كملتي من شي فقرة حط السؤال اللي يقدر يتحط فيها، واحسن حاجة غاتديرها هي تفهّم لصاحبك شي حاجة مفاهمهاش هو . غايستافد هو ولكن المستفيد الكبير هو نتا .. داكشي غايتحفر ليك فعقلك .. المادة خدمها وكأنك بغيتي تفمها باش تقريها لوحدين اخرين، و كيما قلت شرح داكشي اللي قريتيه لصاحبك و هاد الطريقة سميتها (Learning by teaching) التعلم بواسطة التدريس.

 

19- متخليش الـ mood والمشاكل الشخصية ديالك يعرقلوا ليك خدمتك. سول راسك شنو الحاجة اللي كتستحق الخوف دابا. بقا مكالمي و حاول تجاهل داكشي. ايلا مقدرتيش تجاهلوا ولا كانت شي حاجة مستعجلة، طلب المساعدة من واليديك ولا من صحابك.

 

20- ذكر نفسك بلي غير امتحان هادا، وغايكونو وحدين اخرين صعاب عليه من بعد، هادي هي الحياة .. وهاد الخلعة اللي فيك راه كاينة فكاع الناس بحالك. وفكر بشكل ايجابي معندك ماتخسر.

 

فالوقيتة ديال الامتحان، خاصك تقرا كاع داكشي اللي فيها و غير بشوية و بتمعن و قلب كاع الوراق، جاوب على الأسئلة اللي نتا عارفهم هوما اللولين ومتضيعش وقتك فاللي معرفتيش ليه، مغتفكرش على راحتك فيه حيت داير فبالك بلي باقي ليك شلا مايتدار. كل سؤال عطيه الوقت اللي كيستحقو على حسب ؛ اولا معرفتك للإجابة ولا لا، ثانيا واش الاجابة كتطلب وقت كبير ولا لا. وتنفس بعمق، متزربش، متحطش ورقتك تا يكمل الوقت.

 

ملي تخرج نسى شي حاجة سميتها امتحان، متناقش الاجوبة مع صحابك، صاف كملتي نساااااا حيت غادي غير تخلي عقلك مشغول.

أترك تعليق

لن يتم نشر عنوان بريدك الإلكتروني.